ភ្នំពេញ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានប្រាប់ទៅកាន់ពលរដ្ឋដែលជាឪពុកម្ដាយកុំប្រើប្រាស់វិធីប្រៀបធៀបកូនរបស់ខ្លួននិងកូនអ្នកដទៃដើម្បីជំរុញកិច្ចខិតខំប្រឹងប្រែងរបស់ពួកគេ ដោយថាការធ្វើបែបនេះនឹងប៉ះពាល់ដល់សតិអារម្មណ៍ និងទឹកចិត្តរបស់កូនៗ។

ថ្លែងក្នុងពិធីសំណេះសំណាលជាមួយសិស្សនិទ្ទេស A នៅព្រឹកថ្ងៃទី៣ ខែឧសភា ឆ្នាំ២០២២នេះ សម្ដេចតេជោ ជំរុញដល់មាតាបិតាសិស្សគួរប្រើមធ្យោបាយ «លើកទឹកចិត្ត» កូនវិញ ជាជាងប្រើការប្រៀបធៀប ហើយការប្រៀបធៀបនេះក៏មិនត្រូវប្រើសូម្បីតែការប្រៀបធៀបរវាងកូននិងកូននៅគ្រួសារក៏ដោយ។

សម្ដេចថា៖ «នេះជាតំណមមួយក្នុងចំណោមតំណមដោះស្រាយបញ្ហាអារម្មណ៍របស់កូន»។

សម្ដេចបញ្ជាក់ថា ឪពុកម្ដាយត្រូវដឹងពីការបង្រៀនកូន និងត្រូវដឹងពីវិធីសាស្ត្រណាដែលអាចឱ្យកូនរៀនបានខ្លាំងបាន។ សម្ដេចបានប្រើវិធីសាស្ត្រលើកទឹកចិត្តនេះក្នុងការបង្ហាត់បង្រៀនកូនឃើញថាទទួលបានលទ្ធផលល្អ ខណៈសម្ដេចក៏នឹងប្រាប់ដល់កូនៗឱ្យប្រើវិធីសាស្ត្រនេះបង្ហាត់បង្រៀនចៅៗដូចគ្នា៕ 

^{PHOTO: EAC NEWS}